Татарстанда минималь куллану бюджеты артырга мөмкин
Татарстанда 2026 елның беренче кварталы өчен минималь куллану бюджеты 28 948 сум итеп билгеләнергә мөмкин. Бу күрсәткеч 2025 елның дүртенче кварталы белән чагыштырганда 954 сумга күбрәк.
Әлеге карар проекты ТР Хезмәт, халыкны эш белән тәэмин итү һәм социаль яклау министрлыгы тарафыннан әзерләнгән. Хәзерге вакытта документ коррупциягә каршы экспертиза үтә.
Моңа кадәр, 2025 елның икенче кварталында минималь куллану бюджеты 28 160 сум тәшкил иткән иде. Өченче кварталда ул 775 сумга кимеп, 27 385 сумга калган. Дүртенче кварталда исә яңадан 609 сумга артып, 27 994 сумга җиткән.
Минималь куллану бюджеты — кешенең төп физиологик, шулай ук социаль һәм мәдәни ихтыяҗларын капларга тиешле азык-төлек, азык-төлек булмаган товарлар һәм хезмәтләр бәясе.
Канун буенча, бу күрсәткеч яшәү минимумыннан түбән булырга тиеш түгел. Татарстанда 2026 елга яшәү минимумы җан башына 16 098 сум күләмендә расланган. Эшкә сәләтле кешеләр өчен ул — 17 547 сум, пенсионерлар өчен — 13 844 сум, ә балалар өчен 15 615 сум тәшкил итә.
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев