«Балигъ булмаганның иң яхшы җәмәгать тәрбиячесе - 2025» республика конкурсының зона этабы узды

30 май көнне Яңа поселогында аерым атмосфера хөкем сөрде –игелек, өмет һәм ихлас кайгырту атмосферасы. Биредә «Балигъ булмаганның иң яхшы җәмәгать тәрбиячесе - 2025» республика конкурсының зона этабы узды.

Бу ярыш кына түгел – ул кешелеклелек бәйрәме, анда битараф булмаган кешеләр ярдәме белән язмышлары үзгәргән балаларның елмаюлары төп бүләккә әверелә. Конкурсның максаты – авыр тормыш хәлендә калган балаларны опекага алучыларга ярдәм итү генә түгел, ә башкаларны да игелекле эшләргә рухландыру!

Яңа поселогы мәдәният йорты бу көнне чын геройлар җыелган урынга әверелде. Алар рәхмәт сүзләрен көтмиләр, ләкин аларга карата һәр сүздә, һәр карашта яңгырады. Барлык катнашучылар да, һичшиксез, җиңүче! Аларның төп җиңүе – баланың ышанычы, аның якты киләчәккә беренче адымнары.

Конкурста Татарстанның 11 районы: Тукай, Минзәлә, Әгерҗе, Актаныш, Түбән Кама, Алабуга, Зәй, Менделеевск, шулай ук Яр Чаллының Автозавод һәм Үзәк районнары катнашты. Һәр катнашучы үзенең уникаль тарихы – көрәш, ышаныч һәм мәхәббәт тарихы белән уртаклашты. Алар үзләренең тәрбияләнүчеләре турында «авыр яшүсмерләр» турында түгел, ә җылылык җитмәгән балалар турында сөйләделәр.

Һәм менә, киеренке фикер алышудан соң, жюри җиңүчеләрнең исемнәрен игълан итте:

– Латыйпова Гүзәл Заһир кызы (Тукай районы) – Психологик-педагогик социаль үзәк җитәкчесе;

– Угина Елена Владимировна (Түбән Кама районы) – Җинаять-башкарма инспекциясе психологы;

– Сосновская Анастасия Олеговна (Комсомол районы, Яр Чаллы) — Яшьләр белән эшләү буенча белгеч;

– Балобанов Юрий Владимирович (Менделеевск районы) — сәламәтлек мөмкинлекләре чикле балалар өчен мәктәпнең физкультура укытучысы.

Аларны котларга Тукай районы Башкарма комитет җитәкчесе Камил Нәҗмиев килде:

«Бүген без Сезгә гаять зур йөрәгегез, көндәлек хезмәтегез өчен рәхмәт әйтәбез. Чит балалар булмаганын Сез кабат исбат иттегез!»

Катнашучыларга лауреат дипломнары һәм истәлекле бүләкләр тапшырылды. Дөньяда алар кебек кешеләр булганда, һәр баланың бәхетле киләчәккә өмете бар дигән сүз.

Конкурс тагын бер мәртәбә шуны исбатлады: җәмәгать тәрбиячеләре – үз эшләренә тугрылыклы, эчкерсез кайгыртучан һәм профессиональлеге балаларга тормышта таяныч табарга ярдәм итә торган кешеләр. Аларның хезмәте – бәяләп бетергесез.