Каты яңгырлар яву сәбәпле, Яр Чаллыда проспектны су басты, каты җил агачларны аударды + фотолар

4 июньдә Чаллыда кискен җил аркасында агачлар ауды, көчле яңгыр сәбәпле Вахитов проспектында күпер астын су басты. Бүген төрле социаль челтәрләрдә кулланучылар, һава торышының начараюы нәтиҗәләрен фото һәм видеога төшереп социаль челтәрләргә урнаштыра.

Гадәттән тыш хәлләр министрлыгы көчле яңгыр һәм җилнең секундына 15-23 метрга кадәр көчәюе турында кисәткән иде инде. Моның аркасында Чаллыда Яңа шәһәрнең берничә ишегалдында агачлар да ауды һәм анда булган машиналарга зыян да килде.

Әйтергә кирәк, Вахитов һәм Мәскәү проспектлары киселешендәге күпер астында су да баскан. Биредә яңгыр сулары агызу җайланмаларының эшләп өлгерә алмавы аркасында күп итеп су җыелган. Машиналар да, трамвай йөреше дә кыенлашкан.

Фотолар ВК социаль челтәреннән алынды.