Татарстан онкологлары Камчаткадан килгән 42 яшьлек хатын-кызның күкрәк бизен үз тукымаларын кулланып торгызган, дип хәбәр итә Альмир Абашев үзенең МАКС каналында.
М. З. Сигал исемендәге Республика клиник онкология диспансеры табиблары Камчаткада яшәүче 42 яшьлек хатын-кызга күкрәк бизен торгызырга ярдәм иткән. Катлаулы микрохирургия операциясе вакытында белгечләр имплантат урынына пациентның үз тукымаларын кулланган.
Онкологик авыру сәбәпле уң як күкрәк бизен алдырганнан соң, хатын-кыз берничә реконструктив операция кичергән. Әмма организмның шәхси үзенчәлекләре аркасында имплантат та, тукымаларны әкренләп сузу өчен кулланыла торган экспандер да берекмәгән. Санкт-Петербургтагы хезмәттәшләренең киңәше буенча пациент Татарстан онкология диспансерына мөрәҗәгать иткән. Биредә реконструктив-пластик операцияләр үткәрү буенча зур тәҗрибә тупланган.
Хирурглар DIEP-реконструкция ысулын сайлаган. Операция вакытында корсакның аскы өлешеннән тире һәм май тукымалары кисәге, аны кан белән тәэмин итүче тамырлары белән бергә алынып, күкрәк бизе урынына күчерелгән. Аннары белгечләр микроскоп ярдәмендә кан тамырларын тоташтырган һәм күчерелгән тукымаларның кан белән тәэмин ителешен торгызган.
«Без тире һәм май тукымасы кисәген кан тамырлары белән бергә алдык, аны алынган күкрәк бизе урынына күчердек һәм микроскоп астында кан тамырларын тоташтырдык», — дип сөйләгән маммология һәм реконструктив-пластик хирургия бүлеге онкологы Ирина Овчинникова.
DIEP ысулы күкрәк бизен имплантатсыз, пациентның үз тукымалары ярдәмендә торгызырга мөмкинлек бирә.
Нет комментариев