2017 – Экология елы: Тукай районында эко-экскурсия оештырдылар

Россиядә бу ел Экология елы дип игълан ителде. Табигатебезгә карата сакчыл караш тәрбияләүгә багышланган чаралар Тукай районында еш үткәрелә, бигрәк тә яшь буын, мәктәп укучылары белән төрледән-төрле чаралар оештырыла.

Күзкәй авылында балалар белән табигатькә эко-экскурсиягә чыктылар. Урман-кырларның, елга-инешләрнең яшь сакчылары "Урман китапханәсе"ндә кунакта булдылар. Кошларның моңлы җырлары, суларның сихри челтерәве белән хозурланып, кызлар-малайлар күбәләкләр, кошлар, балыклар турындагы китаплар белән танышты. Ә файдалы һәм агулы үләннәр, ашарга яраклы һәм яраксыз гөмбәләрне алар аяк астыннан үзләре үк табып, үзләре үк яшьтәшләренә кызыклы мәгълүмат җиткерде, дип хәбәр итте безгә Күзкәй авылыннан Тәнзилә Шәйхенурова.