Борды чемпионы

Борды мәктәбендә укыганда, беренче тренеры Файсал абыйсы Кәлимуллинның акыллы киңәшләрен онытасы юк. "Син көчле, әмма көрәш нечкәлекләрен һәм алымнарын җентекләбрәк үзләштерәсең бар, ихтыяр көчең зур синең", дип биегрәк үрләр яуларга дәртләндереп торды. Әтисе дә, улының көрәш белән мавыгуын хуплап, Чаллыга атнасына 3 мәртәбә иптәш малае белән күнегүләргә йөртә башлый. Дима тренер Илгиз Шәмсевәлиев җитәкчелегендәге төркемдә шөгыльләнә һәм өметле шәкертенә әйләнә. Авыл Сабан туйларында катнашып, яхшы гына күрсәткечләргә ирешә. Чаллының олы мәйданнарында бил алышып, яшьтәшләре арасында еш кына беренчелекне ала. Мамадыш районы, Җөри авылында үткән Питрау бәйрәмендә батыр калды.

Дмитрий Левашов республиканың татарча көрәшне яратучы спорт сөючеләрнә яхшы таныш. Ул яшүсмерләр арасында республика чемпионы исемен йөртә. 60 килограмм үлчәү авырлыгында зурлар арасында Татарстан беренчелеге призеры булды. Герой-шагыйрь Муса Җәлил исеменә, Татарстан Авыл хуҗалыгы һәм азык-төлек министрлыгы үткәргән ярышларда катнашып, даими икенче урынны яулый. 2010 елда Казанда үткән ярышта татарча көрәш буенча Россия чемпионы исеменә лаек булды.

Якташыбыз Дмитрий Левашов җиңү артыннан җиңү яулый, районыбыз данын чит төбәкләрдә дә таныта. 20 яшьлек Дмитрийга шушы көннәрдә татарча көрәш буенча спорт остасы исеме бирелде. Сөйгән яры белән кавышып, гөрләтеп туй да ясадылар. Районыбызның яшь спорт остасына исәнлек-саулык, гаилә бәхете һәм спорт күгендә яңа уңышларга ирешүен телибез.