Татарстанда туган тел һәм әдәбият буенча олимпиадаларда җиңүчеләр һәм призерлар әзерләгән укытучыларга 115 мең сум күләмендә бер тапкыр түләү биреләчәк. Ел саен мондый премияне 13 педагог алачак.
Яңа ярдәм чарасын Татарстан Республикасы Министрлар Кабинеты раслады. Аңа дәүләт һәм муниципаль белем бирү оешмаларында эшләүче, укучылары туган тел һәм әдәбият буенча республика олимпиадаларында, шулай ук татар теле буенча Халыкара олимпиадада уңышлы чыгыш ясаган укытучылар дәгъва итә ала.
Бүләк алучыларны конкурс нигезендә сайлап алачаклар. Кандидатларны бәяләгәндә экспертлар укучыларның нәтиҗәләрен һәм соңгы өч елдагы күрсәткечләр динамикасын исәпкә алачак. Конкурсны Татарстан Мәгариф һәм фән министрлыгы оештырачак.
Катнашучыларга куелган төп таләпләрнең берсе — салым бурычы булмау. Шулай ук кандидатлар Россия законнары таләпләренә туры килергә тиеш. Түләүләр Татарстан Республикасы бюджеты хисабына башкарылачак.
"Якты юл" газетасына язылыгыз һәм Тукай районындагы яңалыкларны, вакыйгаларны белеп торыгыз
Нет комментариев