Тукай районында Биклән белән Түбән Суыксу авыллары кунакка йөрешә

Шушы көннәрдә Биклән авылы үзешчәннәре Түбән Суыксу авылы мәдәният йортында зур концерт белән чыгыш ясады. Күрше авылда яшәүче сәнгать сөючеләргә бик бай, кызыклы, матур программа әзерләнгән иде. Концерт Биклән халык театры үзешчәннәре Гөлнур һәм Мирза Гимадиевлар, Асия Фазуллина, Раушания һәм Ирек Гимазиевлар, Абдулла Гимадиевлар башкаруында Г.Камалның «Беренче театр» спектакле белән башланып китте. Тамашачыларга иң матур җырларын Рәдиф Сираев, Мирза Гимадиев, Рәйсә Ганиева, Гөлнара Зиятдинова, Асия Фазуллина, Сергей Костин бүләк иттеләр.

Фәния Абдуллина башкаруында Г. Камалның «Банкрот» спектакленнән өзек, Фирия Гарипова, Саимә Рахимова, Хәкимә Ягфарова, Фәния Абдуллина, Гөлнара Зиятдинова, Мирза Гимадиевлар башкаруында К. Тинчуринның «Зәңгәр шәл» спектакленнән өзекләр тамашачылар тарафыннан бик җылы кабул ителде. Илдус Абдуллин һәм Рәшит Тимергалиннарның гармунчылар дуэты, Рәшит Тимергалинның татар халык биюе, Ирек һәм Раушания Гимазиевларның җырлы-биюле чыгышлары күңелләргә дәрт өстәде. Ә «Хәтфә» фольклор ансамбле башкаруында «Тула басу өмәсе» концертыбызга ямь өстенә ямь булды.

Концерт ахырында Түбән Суыксу авылы мәдәният йорты җитәкчесе Инзилә Садыкова иҗат коллективыбызга шундый матур, эчтәлекле концерт өчен тамашачылар исеменнән зур рәхмәт әйтте, иҗади уңышлар теләде. Ә без, үз чиратыбызда, Түбән Суыксу авылы халкына шундый җылы алкышлары өчен, мәдәният йорты хезмәткәрләре Инзилә Садыкова, Надежда Логиноваларга шундый матур каршы алганнары өчен, мул табынлы сыйлары өчен ихлас рәхмәтләребезне җиткердек, үзләрен дә концерт белән Бикләнгә кунакка дәштек, дип яза безгә Биклән мәдәният йорты директры Рузилә Костина.