Тукай районында яшәүче ир-ат ау патроннарын саклау кагыйдәләрен бозган өчен административ җаваплылыкка тартылган.
Эш материалларыннан күренгәнчә, ул шома көпшәле ау коралы өчен 40 патронны махсус сейфта яки бикләнә торган металл шкафта түгел, ә торак йортның бер бүлмәсендә саклаган. Бу гамәл гражданнар коралын һәм аңа патроннарны саклау тәртибенә куелган таләпләргә каршы килә.
Хокук бозу очрагы июнь ахырында ачыкланган. Тикшерү барышында ир-аттан ике тартмада сакланган барлыгы 40 ау патроны алынган.
Суд утырышына хокук бозучы килмәгән. Шул ук вакытта ул эшнең каралу урыны һәм вакыты турында законда билгеләнгән тәртиптә алдан хәбәр ителгән булган.
Суд эш материалларын өйрәнгәннән соң, ир-атны РФ Административ хокук бозулар кодексының 20.8 маддәсе 4 өлеше нигезендә гаепле дип тапкан. Нәтиҗәдә, аңа 500 сум күләмендә административ штраф билгеләнгән.
"Якты юл" газетасына язылыгыз һәм Тукай районындагы яңалыкларны, вакыйгаларны белеп торыгыз
Нет комментариев