Тылсым иясе Рәсилә Хәкимова

- Бик яратам чигү белән утырырга. Диван сатып алганда да уңайлы, кул эше белән утыру өчен кулай булсын дип, махсус заказ буенча, диванның түр ягында менә шундый өстәлен ясадылар, - ди Рәсилә апа Хәкимова.

Чыннан да, йомшак урынга кереп утыр да, лампаңны кабыз да, матурлык дөньясына кереп чум гына. Ә аннан соң инде, әйтерсең лә, Рәсилә ханымның инәсе гүя үзе чигә башлый.

- Сәламәтлегем начарлану сәбәпле, эшемнән китәргә туры килде, сакчы булып эшкә кердем. Ә анда вакыт күп, ничек тә уздырырга кирәк, - ди Рәсилә апа.

Озын вакытны файдалы итәр өчен ул кул эшенә тотына.

- Үземә свитерлар бәйләп кия идем, бүләк тә итә идем, - дип сөйли Рәсилә ханым. - Тик хәзер инде бик бәйләүгә тотынып булмый - куллар ойый. Ә чигү чиккәндә инәне тотып кына утырасың, кирәкле эшне үзе эшли ул, - дип елмайды Рәсилә апа һәм инәсенең чыннан да тылсымлы булуын әйтте.

Кечкенә картиналарын бер атнада чигә икән Рәсилә Хәкимова. Зурларына исә берәр ай вакыт кирәк, ди.

- Әз генә рәсеме күренә башлауга, йөрәк түзми башлый, тизрәк тулы рәсемне күрәсе килә, төсләр уйнавыннан хозурланасы килә башлый. Шуңа күрә, иң мөһиме, картинаны башлау кирәк. Аннан соң үзеннән-үзе чигүгә утырасың ул, - диде Иштирәк авылының чигү остасы.

Бу авылда хәләл җефете Рәис Фәләхович белән 6 ел торалар икән инде.

- Рәис хатыны бит ул! - ди Рәис абый шаяртып Рәсилә ханым турында, үз исеменең «председатель» мәгънәсенә ишарә ясап. Мал-туарларыннан бары тик чыпчыклар гына икән. Хәкимовлар ишегалдын үз иткән алар.

- Көненә бер буханка ипи ашап бетерәләр алар, чыр-чу килеп, - дип сөйләде шаяртуга бик оста булган Рәис Хәкимов.

Менә шулай үзләре дә чөкердәшеп, һәр туар таңны матурлык, кошлар сайравы белән бизәп гомер итәләр Хәкимовлар. Тылсым бар җирдә могҗиза да бар. Ә могҗиза ул - ярату. Тормышның ачы хәсрәтен кичереп, күңелләрендә яратуны саклап кала алган Рәсилә апа белән Рәис абыйга сокланып калдым. Башкарган эшеңә, Аллаһ биргән яңа көнгә, бер-береңә булган ярату - ул чып-чын тылсым була инде.