Ярышлылар язгы чәчүне Җиңү көненә төгәлләргә исәпләп торалар

- Хәзерге үтә җаваплы чорда егетләр ике сменалап 12шәр сәгать эшлиләр. Техника бер минутка да туктап тормый. Механизаторларның вакытларын әрәм итмәс өчен, төшке һәм кичке ашны да кыр ыстанына алып киләбез, ягулык та басуга китерелә, - ди җитәкче. - 2,9 мең гектар чәчүлек җиребез бар. Уҗымнарны тулысынча тукландырдык, бүген инде чәчүгә тотындык. Иртәгегә кадәр вика һәм солыны чәчеп бетерү күздә тотыла. Аннары арпа, бодай чәчүгә керешәчәкбез. Һава торышы яхшы булса, 9 Майларга тәмамларбыз дигән өмет бар. Биредә узган ел ук чәчелеп куелган люцерна басуы, - ди, алгы якта җәелгән басуга күрсәтеп. - Кичә, бер смена эчендә, Рафис Хаматов 150 гектар күпьеллык үлән җирен тырмалап чыкты. Бүген аңа алмашка Фазыл Бәйрәмов килде. Ул да сыната торганнардан түгел. Алар МТЗ-1221 тракторына СГ-21 тырма агрегатын тагып, күпьеллык үлән тырмалыйлар. Уңда 65 гектар вика басуы, сулда 50 гектар солы. Бу басулар күптән тырмаланган, хәзер биредә кытай тракторы YTO-1254 Әнвәр Ногъманов культивацияли, - ди Расим Мансурович, эшләүче тракторга күрсәтеп. - Аннан соң чәчүгә керешәчәкбез - культивацияләү һәм чәчү арасы 3 сәгатьтән дә артмаска тиеш. Бу шарт үтәлә.

Чәчкеч агрегаты янында кайнашучы эшчеләр янына килеп җиттек. Безне чәчүче Рафис Хаматов һәм басуга йөк машинасына төяп 10 тонна вика орлыгы алып килгән Фәрит Фәрваев каршы алды.

- Әлеге чәчкечне бу елны гына 1-600 000 сумга сатып алдык, - ди җитәкче, кояш нурында ялтырап торган өр-яңа агрегатка күрсәтеп. - Быелгы чәчүдә ике агрегат катнашачак. Кәеф күтәренке, техника гөрләп тора, хәзергә һава шартлары да уңай тора - эшләр өчен бөтен шартлар да бар.

Чәчүгә чыккан механизаторлар һәм чәчүчеләрнең кәефе яхшы. Көннәр матур торсын, вакытында яңгырлар явып, вакытында җиле дә иссен, диләр алар, беравыздан.