Татарстанда коммуналь хезмәтләр өчен түләүләр 2026 елның 1 октябреннән яңадан каралачак. Россия Хөкүмәте республика өчен тарифлар үсешенең чик индексын 13,4 процент итеп билгеләде. Шул ук вакытта муниципалитетларда җирле шартлар һәм инженерлык инфраструктурасының торышы исәпкә алынып, аерым хезмәтләр буенча тарифларның үсеше 18,2 процентка кадәр җитәргә мөмкин.
Шул ук вакытта 13,4 процентлык чик индексы коммуналь хезмәтләрнең һәрберсенә бәя нәкъ шул күләмдә артачак дигәнне аңлатмый. Квитанциядәге соңгы түләү суммасы конкрет тарифка һәм кулланылган хезмәт күләменә карап формалаша.
Газ
1 октябрьдән халык өчен табигый газның бәясе кубометрына 9,28 сум булыр дип көтелә. Ел башыннан тариф 8,55 сум тәшкил итә, ягъни бәя 73 тиенгә артачак.
Электр энергиясе
Газ плитәләре булган шәһәр йортларында электр энергиясе тарифы кВт·сәгать өчен 5,82 сумнан 6,47 сумга күтәреләчәк. Электр плитәләре булган йортлар өчен тариф 5,82 сум, ә авыл җирендә яшәүчеләр өчен 4,85 сум булачак.
Шул ук вакытта электр энергиясе бәясе куллану күләменә дә бәйле. Моның өчен өч тариф диапазоны каралган: аена 3900 кВт·сәгатькә кадәр, 3900дән 6000 кВт·сәгатькә кадәр һәм 6000 кВт·сәгатьтән артык. Мәсәлән, газ плитәләре булган шәһәр йортларында яшәүчеләр өчен беренче диапазонда октябрьдән тариф кВт·сәгать өчен 6,47 сум тәшкил итәчәк. Икенче диапазонда ул 8,54 сумга җитәчәк, ә электр энергиясен айга 6000 кВт·сәгатьтән артык кулланганда тариф 12,41 сум булачак.
Чүп чыгару
Октябрьдән «УК «ПЖКХ»» ҖЧҖ карамагындагы күпфатирлы йортларда яшәүчеләр өчен тариф бер кешегә 131,51 сум, «Гринта» ҖЧҖ – 135,13 сум тәшкил итәчәк.
Салкын һәм җылы су
Салкын су өчен түләү 20 процентка, ә җылы су бәясе 16,7 процентка артачак.
"Якты юл" газетасына язылыгыз һәм Тукай районындагы яңалыкларны, вакыйгаларны белеп торыгыз
Нет комментариев