Татарстан талпан энцефалиты куркынычы булган төбәкләр исемлегенә керде
Роспотребнадзор Россиянең берничә төбәгендә талпан энцефалиты белән зарарлану куркынычы артуы турында хәбәр итте. Куркыныч сакланган төбәкләр арасында Татарстан да бар. Бу хакта ведомство мәгълүматларына сылтама белән РИА Новости хәбәр итә.
Идел буе федераль округында талпан энцефалиты белән зарарлану куркынычы сакланган берничә төбәк билгеләнгән. Татарстан белән беррәттән, бу исемлеккә Киров, Түбән Новгород, Самара, Ульяновск һәм Оренбург өлкәләре, шулай ук Пермь крае, Башкортстан, Мари Эл һәм Удмуртия дә керә. Димәк, әлеге регионнарда талпан тешләгән очракта, инфекция йоктыру ихтималы шактый югары булып кала.
Талпан энцефалиты — үзәк нерв системасын зарарлаучы җитди вируслы авыру. Авыр очракларда ул инвалидлыкка, хәтта параличка китерергә мөмкин. Табиблар иң ышанычлы саклану чарасы итеп вакцинацияне атый, аны талпаннар активлашкан сезон башланганчы ук ясату киңәш ителә, дип яза РИА Новости.
Энцефалиттан тыш, талпаннар башка куркыныч инфекцияләр таратырга сәләтле. Алар арасында боррелиоз, туляремия, эрлихиоз кебек авырулар бар. Бер үк вакытта берничә инфекция белән зарарлану аеруча куркыныч очраклардан санала. Мондый вакытта авыру катлаулырак уза һәм дәвалану вакыты да озаккарак сузыла.
Шушы вәзгыятьтән чыгып, профилактика чараларына аеруча игътибар бирергә киңәш ителә. Талпаннардан саклану өчен махсус саклагыч чаралар куллану мөһим. Табигатькә чыкканда тәнне каплый торган ябык кием кияргә кирәк. Урманнан яки паркта йөреп кайткач, үзеңне һәм киемне җентекләп тикшерү дә авыру йоктыру куркынычын киметә.
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев