Ялда булган хәрби хезмәткәр Чаллы паркында аңын югалткан хатын-кызга ярдәм иткән

Әлеге хәл сугышчы паркта эт белән йөргәндә килеп чыга. Ул эскәмиядә аңсыз яткан хатын-кызны күреп ала. Якынрак килеп, ир-ат аның хәлен белергә уйлый, ләкин ханым җавап бирми.

Хәрби бәлагә тарыган кеше яныннан тыныч кына үтеп китә алмый, ашыгыч ярдәм бригадасын чакырта. Элегрәк ул янгын сүндерүче булып эшләгән, шуңа күрә кешеләргә ярдәм итүне үзенең бурычы дип саный.

Медиклар тиз арада хатын-кызны ашыгыч медицина ярдәме хастаханәсенә илтеп җиткерәләр. Табиблар әйтүенчә, китерелгән вакытта ул авыр хәлдә була. Яр Чаллының  штаттан тыш баш реаниматологы Васил Фазылов билгеләп үткәнчә, мондый очракларда һәр минут кадерле, шуңа да тирә-юньдәгеләрнең реакциясе хәлиткеч роль уйный.

Кирәкле медицина ярдәме күрсәтелгәннән соң, пациентның хәле яхшыра. Хатын-кыз аңына килгәндә, аның гомеренә куркыныч янамый.

Соңрак коткарылган хатын-кызның туганнары хәрби белән элемтәгә чыгып, битараф калмаганы өчен рәхмәт белдерделәр. Пациентның кызы әйтүенчә, ярдәм вакытында күрсәтелмәсә, нәтиҗәләр аянычлы булырга мөмкин иде.

Медицина учреждениесе хезмәткәрләре дә сугышчыга уяулыгы һәм гадәттән тыш хәлдә дөрес эш итүе өчен рәхмәт әйттеләр. Рәхмәт билгесе итеп аңа истәлекле бүләк тапшырылды.

Хәрби үзе исә бу эшне бернинди дә батырлык дип санамый һәм аның урынында һәркем шулай эшләр иде дип ышана. Якын арада ул ялын тәмамлап, махсус хәрби операция зонасына кабат хезмәткә кайтачак.

Фото һәм мәгълүмат Татар-Информ агентлыгыннан