Балалар белән чит илгә юл тотучыларга сәяхәт алдыннан документларны барларга һәм кабул итүче илнең керү кагыйдәләре белән танышырга кирәк. Чөнки 14 яшькә кадәрге балаларның да Россиядән читкә чыкканда үзләренең чит ил паспортлары булырга тиеш.
2026 елның 20 гыйнварыннан 14 яшькә кадәрге балаларга Россиядән чит илгә чыгу өчен үзләренең чит ил паспортлары булу мәҗбүри. Бу таләп элек туу турындагы таныклык белән генә барырга мөмкин булган илләргә дә кагыла.
Дәүләт Думасы депутаты Сергей Кривоносов РИА Новости агентлыгына сәяхәткә әзерләнгәндә нинди документларны тикшерергә кирәклеген сөйләгән. Аның сүзләренә караганда, ата-аналар баланың паспортының гамәлдә булу вакытын һәм барырга җыенган илнең таләпләрен алдан ачыкларга тиеш. Кайбер дәүләтләрдә паспорт сәяхәт тәмамланганнан соң да берничә ай гамәлдә булырга тиеш.
Үзең белән баланың туу турындагы таныклыгын да алу киңәш ителә. Әгәр баланың һәм озатып баручы өлкән кешенең фамилияләре төрле икән, туганлыкны яки фамилия алыштыруны раслаучы документлар кирәк булачак.
Бала әти-әнисеннән башка юлга чыкса, законлы вәкилләрнең берсеннән нотариаль ризалык таләп ителә. Шулай ук сәяхәт алдыннан виза, электрон рөхсәт һәм транзит илләрнең документларга кагылышлы таләпләрен тикшерергә кирәк.
Нет комментариев