«Питрау»ның баш батырына 500 мең сум бүләк тапшырылачак

Быел «Питрау» республика бәйрәме 18 июльдә Мамадыш районының Җөри авылында узачак. Чараның иң көтеп алынган өлешләренең берсе — милли көрәш ярышлары булачак. Бәйгенең абсолют җиңүчесенә, ягъни «Питрау»ның баш батырына, 500 мең сум күләмендә акчалата бүләк тапшырылачак.

Көрәш мәйданында спортчылар биш авырлык категориясендә көч сынашачак. Яшүсмерләр арасында җиңүчеләргә дә бүләкләр каралган: беренче урын алган көрәшчегә — 25 мең, икенче урын иясенә — 20 мең, өченче урынга чыккан спортчыга 15 мең сум биреләчәк.

Өлкәннәр арасында призлар күләме тагын да югарырак булачак. Һәр үлчәү авырлыгында беренче урын өчен — 50 мең, икенче урын өчен — 30 мең, өченче урын өчен 20 мең сум акчалата бүләк тапшырылачак.

«Питрау»ның баш батыры исемен алган көрәшчене бүләкләү тантанасында «Керәшен чибәре» бәйгесе җиңүчесе дә катнашачак. Быелгы бәйрәмдә керәшен халкының иң гүзәл һәм сәләтле кызы да ачыкланачак. Моннан тыш, кунакларны танылган артистлар һәм фольклор коллективлары чыгышлары көтә.

Н.Туганов фотосы