Калмия авылында гомер итүче бакчачы Наилә Зәйнетдинова үз бакчасында төрле яшелчә һәм җиләк-җимешнең сыйфатлы уңышын җыеп алган. Бигрәк тә кабаклары искитмәле — аларның кайберләренең авырлыгы 30 килограммнан да артып киткән. Сыйлы уңыш иясе газета укучыларыбыз белән үзенең куанычын гына бүлешеп калмыйча, кабактан бик җайлы һәм тәмле аш рецептын да тәкъдим итә.
Кая карама — кабак! Нәкъ менә бу яшелчә Наилә Зәйнетдинованың бакчасында быел төп яшелчәгә әйләнгән.
Ишегалдындагы зур-зур сары кабакларны бүген берүзең генә күтәрүе дә җиңел түгел, чөнки үлчәү телләре утыз килограммнан артыкны күрсәтә.
Оста бакчачы сүзләренчә, кабак артык тәрбия таләп итмәсә дә, кояшлы җәй һәм дөрес сугару үз нәтиҗәсен биргән. Бүгенге көндә оста хуҗабикә зур уңышны кадерләп саклау һәм эшкәртү белән мәшгуль.
«Кабак — файдалы витаминнар хәзинәсе, аннан бик күп төрле сыйлар әзерләргә була», — ди Наилә ханым.
Көз айларында җанга һәм тәнгә җылылык бирә торган, бик җайлы кабак ашы рецептын да газета укучыларыбызга тәкъдим итәбез.
Наилә Зәйнетдиновадан «Алтын көз» ашы рецепты
Кирәк:
- Кабак (чистартылган) — 500 гр
- Бәрәңге — 2 данә
- Кишер — 1 данә
- Суган — 1 данә
- Сөт өсте (сливки) яки сөт — 100–150 мл
- Кыздыру өчен — сары май яки үсемлек мае
- Тәме буенча — тоз, борыч, сарымсак
Әзерләү тәртибе:
Кабакны, бәрәңгене, кишерне һәм суганны кабыгыннан чистартып, уртача зурлыктагы шакмакларга турыйбыз. Калын төпле кәстрүлгә май салып, башта суган, кишер һәм вакланган сарымсакны 2-3 минут кына кыздырып алабыз. Бу ашка тирәнрәк һәм үзенчәлекле тәм бирәчәк.
Соңыннан кәстрүлгә кабак белән бәрәңгене өстибез. Өстенә яшелчәләр капланырлык кына кайнар су яки ит шулпасы салабыз. Тоз өстәп, яшелчәләр йомшарганчы (якынча 15–20 минут) уртача утта кайнатабыз.
Кәстрүлне уттан алып, барлык яшелчәләрне блендер ярдәмендә бербөтен бертөрле массага әйләндерәбез. Пюрега сөт өсте (сливки) салып, яхшылап болгатабыз һәм кабат утка куябыз. Аш кайнап чыгу дәрәҗәсенә җиткәч (ләкин кайнатып чыгарырга ярамый), аны шунда ук уттан алабыз.
Хуҗабикәдән киңәш: Ашны өстәлгә чыгарганда һәр тәлинкәгә азрак кыздырылган кабак орлыгы сибәргә яки өйдә ясалган киптерелгән ипи кисәкләре - сохари куярга онытмагыз. Бу ашны тагын да тәмлерәк итәчәк. Ашларыгыз тәмле булсын!
"Якты юл" газетасына язылыгыз һәм Тукай районындагы яңалыкларны, вакыйгаларны белеп торыгыз
Нет комментариев