Татарстанда 15 һәм 17 яшьлек яшүсмерләр машина һәм питбайк белән законсыз идарә иткән өчен тоткарланган

Лениногорск районында ике яшүсмерне транспорт белән законсыз идарә иткән өчен тоткарлаганнар: берсе җиңел автомобиль руле артына утырган, икенчесе питбайк белән идарә иткән. Бу хакта Татарстан буенча Эчке эшләр министрлыгы хәбәр итә.

Ведомство мәгълүматларына караганда, 24 май иртәсендә Дәүләт автоинспекциясе хезмәткәрләре 17 яшьлек егет идарә иткән «ВАЗ-2114» автомобилен ачыклаган. Аның машина йөртү хокукы булмаган. Аңа карата административ беркетмә төзелгән, шулай ук балигъ булмаганнарның иминлеген тәэмин итү кагыйдәләрен үтәмәгән өчен ата-анасы да җаваплылыкка тартылган. Автомобиль штрафстоянкага куелган.

Моннан тыш, хокук сакчылары 15 яшьлек яшүсмерне дә тоткарлаган, ул питбайкта йөргән килеш юлга чыккан булган. Аның ата-анасына транспорт чарасын тиешле таныклыксыз кешегә тапшыру факты буенча беркетмә төзелгән. Аларга 30 мең сумга кадәр штраф яный.

Полиция хезмәткәрләре ике очракта да ата-аналарның балаларны тәрбияләү һәм контрольдә тоту бурычларын тиешенчә үтәмәү билгеләре булуын ассызыклый.