Җир участогына ялган документ та биргәннәр, ЮХИДИ инспекторына акча да төрткәннәр

Быел авыр һәм аеруча авыр җинаятьләр арткан. Саннарның артуы шуның белән дә бәйле, быел «Бакчасарай» бакчачылык ширкәтендә бик күп урлаулар теркәлгән һәм алар ачылган.

Җәмәгать урыннарында, исерекләр һәм балигъ булмаганнар тарафыннан кылынган җинаятьләр дә күбәйгән. Мәсәлән, Чаллыдан бер яшүсмернең бакча йортыннан биш тапкыр әйбер урлаганы беленгән. Ә элек хөкем ителгәнннәр тарафыннан эшләнгән кырын гамәлләр узган елның беренче кварталы белән чагыштырганда ике тапкыр кимегән.

Шәхескә карата эшләнгән вак җинаятьләрнең, ягъни кыйнауларның сәламәтлеккә җиңелчә зыян салуларның, үтерү белән янауның кискен артып китүен искәртә район прокуроры. Узган ел бу чорда андыйлар 24 булса, быел 46 теркәлгән. Бу җинаятьләр барысы да ачылган.

Уен автоматларын юкка чыгару буенча да районда эш дәвам итә. Ел башында «Ранг-Ойл» ягулык салу станциясеннән, Яр Чаллы - Зәй юлындагы «Чулпан» кафесыннан, Боровецкоедагы бер ял базасыннан уен автоматлары алынган.

Өч айда коррупцион характердагы 14 җинаять теркәлгән. Аның 10ысы бер авыл җирлеге башкарма комитеты хезмәткәренең ялган документлар ярдәмендә җир участоклары рәсмиләштерүе белән бәйле. 2 тапкыр ЮХИДИ инспекторына ришвәт төртү, 2 тапкыр бакчачылык ширкәте рәисләренең участокка ялган документлар бирү фактлары ачыкланган. Апрель башында тикшерү комитеты җир участокларына ялган документлар биргән тагын бер элеккеге авыл җирлеге башлыгына карата җинаять эше кузгатылган. Коррупция белән бәйле тагын берничә очракка карата җинаять эшләре ачу өчен бүген материаллар туплана.