Волонтерлар ярдәм итә

Тукай районында бүгенге көндә 141 волонтер теркәлгән. Алар арасында, социаль хезмәткәрләрдән тыш, китапханәчеләр, укытучылар белән тәрбиячеләр, төрле оешма һәм учреждениеләрдә эшләүчеләр, яшьләр оешмалары вәкилләре бар. Мисалга, Круглое Поле бистәсендә дүрт волонтер эшли. Икесе – Фәнүзә Зарипова белән Айгөл Шабакаева – социаль хезмәткәр буларак алынган, тагын ике кеше – идарәче компания инженеры Илдар Якупов һәм авыл җирлеге башкарма комитеты хезмәткәре Ләйсән Абдрахманова – ирекле рәвештә теләк белдергәннәр. Волонтерлар барысы да dobro.ru сайтында теркәлгән. 
Авыл җирлеге башлыгы Эльмира Низамиева әйтүенчә, Круглое Поле бистәсендә 3904 кеше яши. Коронавирус таралу куркынычы яный башлау белән олы яшьтәге кешеләрне барлап чыкканнар. Биредә 65 яшьтән өлкәнрәкләрнең саны 433, шулардан 99 кеше ялгыз яшәүче. Җирлек башкарма комитеты хезмәткәрләре аларның барысы белән дә элемтәгә кергән. Күп фатирлы йортларның подъездларына, мәгъ-лүмат такталарына «кайнар элемтә» номерлары язылган листовкалар беркетеп чыкканнар. 
«Без ялгыз өлкән-нәргә «кайнар элемтә» номеры эшләве турында аңлаттык. Әлегә шалтыратучылар күп түгел. Чөнки ялгыз яшәүче ярдәмгә мохтаҗ кешеләр үзләренә беркетелгән социаль хезмәткәрләр белән даими элемтәдә тора, – ди волонтер, авыл җирлеге башкарма комитеты белгече Ләйсән Абдрахманова. – Эшкә килгәндә урамда очраган кешеләргә дә битлек кияргә, санитария таләпләрен үтәргә кирәклеген аңлатабыз. Шулай ук сәбәпсез чыгып йөрмәскә кирәклеген төшендерәбез.»
Фәнүзә Зарипова исә «Шәфкатъ» халыкка социль хезмәт күрсәтү комплекслы үзәге хезмәткәре. Бу өлкәдә ул инде 28 ел, Круглое Поле Чаллының Комсомол районына кергән вакыттан ук эшли. Аның карамагында биш ялгыз өлкән кеше. Алар янына Фәнүзә ханым үзара килешенгән график буенча йөри. 
«Волонтер булып та теркәлгәч, эш артып китте, – ди Фәнүзә Гыйззәдулловна. – Әле менә минем карамактагы Мәүлидә апаның күршесе Илһамия апа мөрәҗәгать итте. Аңа 80 яшь. Үзизоляция таләпләре турында ишетеп белгән, балалары кайтып йөри алмаячагын аңлаган да, ярдәм итүемне үтенде. 
Волонтерлар азык-төлекне, даруларны, кирәк-яракларны якындагы кибеттән һәм аптекадан алып кайтып бирә. Әйберләр өчен өлкәннәр кулына чек тапшырыла һәм үзара исәп-хисап ясала.
Ялгыз яшәүче 65 яшьтән өлкәннәргә азык-төлек һәм дарулар илтүдә волонтерларга «Шәфкатъ» халыкка социаль хезмәт күрсәтү комплекслы үзәге хезмәткәрләре ярдәм итә. Алар, волонтерлар белән бергә, мөрәҗәгать итүчеләрнең өйләренә бара. Круглое Поле бистәсенең социаль хезмәткәре Айгөл Шабакаеваның (ул волонтер да), мәсәлән, волонтерлар белән өлкәннәр янына барып кайту мөмкинлеге бар.
Менә шулай, коронавирус дигән зәхмәт без кешеләрне физик яктан бер-беребездән ерагаерга мәҗбүр итсә, рухи яктан, киресенчә, якынайта, берләштерә, битараф булмаска өйрәтә.