«Тоннель»дә иминият полисыннан башка йөрүчеләр күп ачыкланды

Район ЮХИДИ бүлегенең юл-патруль хезмәте машина йөртүчеләрнең юл йөрү кагыйдәләрен бозу фактларын ачыклау буенча «Тоннель» дип аталган махсус рейдлар үткәрә. 14 апрельдә Яр Чаллы - Сарман трассасында уздырылган шундый чарада инспекторлар һәм участок вәкаләтлеләре барысы 45 административ беркетмә төзеделәр. Хокук саклаучылар иминият полисыннан башка йөрүчеләрне күп ачыкладылар. Шулай ук куркынычсызлык каешын такмыйча, балаларны креслога утыртмыйча, транспортын теркәмичә йөрүчеләр ачыкланды. Чираттагы рейд 21 апрель көнне иртәнге сәгать 6дан 9га кадәр «Татарстан» совхозы поселогында үткәреләчәк, дип хәбәр итә район ЮХИДИ бүлеге башлыгы Шамил Ганиев.