Район игенчеләре алдына бу атнада бөртекле культуралар чәчүне төгәлләү бурычы куелды

Районда язгы чәчү буенча алдынгылар рәтендә баручы хуҗалыклар да аталды. Бу - «Ярыш» хуҗалыгы. Әлеге хуҗалыкта язгы кыр эшләре баштан ук яхшы оештырылган - эшчеләр ике смена эшли. Шулай ук куәтле чәчү техникалары булган «Кама-Бекон» хуҗалыгы һәм «Кама» агрофирмасы да уңай яктан телгә алынды. Уртача район күрсәткечләреннән артта калучы хуҗалыклар да әйтелде. «Камский» җитештерү кооперативына, «Тукай азык-төлек корпорациясе»нә һәм «Парадиз» оешмасына темпларны арттырырга кирәк диелде.

Хәйдәр Сабитов әйтүенчә, салкын һава торышы һәм әледән-әле килеп явучы яңгырлар аграрийларга язгы чәчүне тулы куәткә алып барырга мөмкинлек бирми. Әле мондый һава торышы май ае буе саклана дип фаразлый белгечләр. Шулай да хуҗалыкларга язгы чәчү эшләрен югары сыйфатта һәм мөмкин булган кадәр кыска вакыт эчендә тәмамларга кирәк. Район башлыгы Васил Хаҗиев авыл хуҗалыгы хезмәтчәннәренә бу атнада язгы бөртекле культуралар чәчүне төгәлләү бурычын куйды.

Без «Р-Агро» (элеккеге «Чаллы яшелчәсе+») хуҗалыгында эшләр барышы белән таныштык. Хуҗалык җитәкчесе Ришат Хатыйпов сүзләренә караганда, чәчү оешкан төстә бара. Бүгенге көндә бу хуҗалыкта язгы чәчү 67 процентка башкарылган.

- Арпа, солы, борчак, берьеллык үлән тулысынча чәчелеп бетте. 4 көн элек бодай чәчүгә тотындык. Пландагы 700 гектар мәйданның 300 гектары чәчелде. Өченче көн кукуруз чәчүгә керештек. Бүгенгә 60 гектар чәчелде, - дип эшләнгән эшләрне санады җитәкче.

Хуҗалыкта бүгенге көндә яшелчә утырту эшләре дә бара. Кишерне тулысынча чәчеп бетергәннәр, чөгендер утыртыласы туфракка ашлама керткәннәр.

- Бәрәңге утыртуга да шушы көннәрдә тотынырбыз, әлегә әйбәтләп җирен әзерлибез, - диде Ришат Хатыйпов.

Хуҗалык басуларында күптән түгел чәчелгән арпа да тишелеп чыга башлаган.