Район эшмәкәрләре башкалада җыенда катнашты

Районның ике эшмәкәре - фермерлар ассоциациясе рәисе Минталип Миңнеханов һәм Боерганнан Айрат Арсланов Казанда Россия регионнары һәм Татарстан авыллары эшмәкәрләренең бишенче бөтенроссия җыенында катнаштылар. Чарага барлыгы 700гә якын бизнес вәкиле чакырылган иде.

Съезд делегатлары, секцияләргә бүленеп, өч тема буенча - «Җир эшкәртү» (җир эшкәртү, үсемлекчелек, бакчачылык), «Терлекчелек» (терлекчелек, кошчылык) һәм «Халык кәсепләре» (умартачылык, балыкчылык) турында сөйләштеләр.

Җыен кысаларында Теләче районына эшлекле сәфәр оештырылды, анда эшмәкәрләр авыл хуҗалыгы тармагындагы тәҗрибәләре белән уртаклашты.

«Корстон»да РФ регионнарында җитештерелгән хәләл продукция һәм халык кәсепләре товарларыннан күргәзмә оештырылган иде.

Түгәрәк өстәл вакытында район эшмәкәре Минталип Миңнеханов Тукай районы бизнес вәкилләренең эшчәнлеге, якындагы шәһәрне продукция белән тәэмин итүе турында сөйләде. «Бүгенге шартларда мондый очрашулар үткәрү бик кирәк. Җыенда катнашучыларның ачыклыгы һәм хезмәттәшлеккә әзерлеге миндә бик уңай тәэсирләр калдырды. Түгәрәк өстәлдә җитди һәм кызыклы тәкъдимнәр яңгырады, элемтәләр булдырылды», - дип фикерләре белән уртаклашты ул.