«Кышын кошларны ашатыгыз» акциясенә кушылыйк!

«Кышын кошларны ашатыгыз» акциясе дә әлеге вәзгыятьне күз уңында тотып, «нәни дусларга» ярдәм максатыннан оештырыла. Аңа балалар бакчаларында тәрбияләнүчеләр һәм ата-аналар, мәктәп укучылары, югары һәм махсус белем бирүче уку йортларында укучы студентлар да актив катнаша.

Шушы көннәрдә, без дә, Кнәз авылының мәдәният йорты хезмәткәрләре, «Яшел патруль» яшьләр оешмасы белән берлектә «Кышын кошларны ашатыгыз» акциясенә кушылдык. «Яшел патруль» оешмасының актив әгъзалары иң баштан үз куллары белән кошларга махсус җимлекләр ясадылар, ә соңыннан исә аларга кошлар ашый торган җимнәр салып, җимлекләрне агач башларына урнаштырдылар. Күп тә үтмәде, җимлекләргә нинди генә кошлар очып килмәде, алар арасында песнәкләр дә, чыпчыклар да, карабүрекләр дә бар иде. Хәзер исә балалар үзләре ясаган җимлекләрне төрле орлыклар белән тәэмин итеп тора. «Кошларның чыркылдап сыйлануын, сөенүен балалар кызыксынып күзәтә. Шундый игелекле, яхшы эш эшләүләренә балалар чын йөрәктән сөенә. Әлеге акциягә күбрәк кеше кушылсын иде. Яхшылыкны бергә эшлик! Җимлекне бит пластик бутылкадан, кәгазь коробкадан да ясап була. Азыкка килгәндә кошларга бераз гына көнбагыш, тары ярмасы, ак ипи салсаң - шул җитә. Бу бит барысы да эшләнә ала торган эш. Битараф булмасак иде», - дип язып җибәргән редакциябезнең электрон почтасына (yakti.ul76@gmail.com) Кнәз авылының мәдәният йорты директоры Тамара Тузеева.