Иң яхшы әйдаман район данын Казанда яклап чыгачак

Бәйге 4 этаптан торды. Беренчесендә әйдаманнар үзләре турында тулырак сөйләделәр, презентацияләр күрсәттеләр, икенче өлештә аларга теоретик мәсьәләләр чишү биремнәре тәкъдим ителде. Өченче этапта иң яхшы әйдаман исеменә дәгъва кылучылар педагогик ситуациядән чыгу юлларын эзләделәр. Дүртенче этапта исә укучылар үзләре үткәрәчәк чараны тәкъдим итәргә, ягъни презентация ясарга тиешләр иде. Катнашучыларның һәрберсе дә бирелгән биремнәрне үтәп, жюри әгъзалары алдында үзләренең бар осталыкларын да күрсәттеләр.

Жюрига килгәндә, аның составында мәктәптән тыш эшләр бүлеге җитәкчесе Сания Сәйдәшева, аның урынбасары Әлфия Шәйдуллина, бүлек мөдире Азалия Низамиева, методист-психолог Александр Мочалов бар иде. Катнашучылар арасында иң күп баллны Бәтке авылының VII сыйныф укучысы Руслан Камалетдинов җыйды. Руслан безнең район данын «Иң яхшы әйдаман - 2017» республика бәйгесенең финал этабында яклап чыгачак. Уңышлар сиңа, Руслан! Җиңү белән кайтуыңны теләп калабыз!

P. S. Чарадан фотоларны «Вконтакте» социаль челтәрендәге «Якты юл» («Светлый путь») газетасының рәсми төркеменнән (http://vk.com/club54482574) карый аласыз. Безнең белән калыгыз!