Буыннарны берләштерүче хәтер: Борды авылында — Җиңү бәйрәме

Тантаналы митинг Россия Федерациясе һәм Татарстан Республикасы гимнарының мәһабәт авазлары белән башланып китте.

Чараны Борды авыл җирлеге башлыгы Роза Әбделманова ачып җибәрде. Аның чыгышында горурлык та, сагыш та бар иде. Роза Николаевна билгеләп үткәнчә, вакыт аяусыз: бүгенге көндә Бөек Ватан сугышы ветераннары санаулы гына калып бара, ләкин аларның эшен бүгенге буын дәвам итә. Хәзерге вакытта Ватаныбызны махсус хәрби операция (СВО) зонасында авыл егетләре саклый. Аларның кайберләре беренче көннән үк алгы сызыкта хезмәт итә. 

Бәйрәмнең дулкынландыргыч мизгеле — иң кечкенә катнашучыларның чыгышы булды. Сабыйлар башкаруындагы «Кояш һәрчак булсын» җыры күпләрне елатты. Авыл мәктәбе укучылары да зур әзерлек белән килгән иде: алар сугыш елларына багышланган масштаблы тамаша тәкъдим иттеләр. Укучыларның чыгышы яшь буынның үз иле тарихын тирән аңлавын күрсәтте.

Өлкән буын да читтә калмады. Авылның үзешчән артистлары сугыш елларының йөрәккә үтә торган җырларын башкардылар. Аларның тормыш тәҗрибәсе белән сугарылган ихлас тавышлары бәйрәмгә аеруча тирән мәгънә өстәде — җыр һәрвакыт халкыбызга иң авыр чакларда да бирешмәскә ярдәм иткәнен тагын бер кат күрсәтте. 

Авыл халкы митингка фронтовик бабаларының портретларын күтәреп килде. Бу йөзләргә карап, берәүнең дә онытылмавын аңлыйсың. Бер минут тынлыктан соң, авылдашлар һәйкәл янына чәчәкләр салдылар.

Тукай районы җитәкчелеге исеменнән авыл халкын «Якты юл» («Светлый путь») газетасының баш мөхәррире Олеся Аверьянова котлады.

Тантананың иң югары ноктасы булып «Җиңү көне» («День Победы») җырын бергәләп башкару торды. Митингта катнашучыларның барысы да — кунаклардан алып мәктәп укучыларына кадәр — бу легендар җырны бердәм булып җырладылар.

Тантаналы өлештән соң бәйрәм мәдәният йорты территориясендә дәвам итте. Биредә кыр кухнясы эшләде. Кайнар чәй һәм һәркем яратып ашый торган солдат боткасы бәйрәмнең матур ахыры булды, кешеләрне бер өстәл артында берләштерде.

Чарада 100дән артык кешенең катнашуы — Борды халкы өчен Җиңү бәйрәменең бүгенге көндә дә иң мөһим, бердәмлек һәм изге эшкә ышану символы булып калуын исбатлый.