Безнең белән калыгыз!

Хөрмәтле газета укучылар! 2013 ел тәмамланырга санаулы көннәр калып бара. Күпме матур очрашулар, шатлыклы вакыйгалар бүләк итте ул. Ә бит 13кә тәмамлануы белән шикләндергән, шөбһәләндергән иде ул безне. Юрау, ырым-шырымнар раска килмәде. 2013 ел - хәерле, имин ел булды! Тормыш календареның битләрен санаганда, көн артыннан көн газетабыз коллективы сезнең белән бергә тормыш вакыйгалары эчендә кайнады, авыллардагы, райондагы һәр яңалык, гыйбрәтле хәлләрне газетабыз битләрендә яктыртып барырга тырыштык. Без күрми калганнарын урыннардагы даими хәбәрчеләребез җиткерде. Активлыклары өчен без аларга бик рәхмәтле. Ел тәмамлана, аның белән бергә газетабызның 2014 елның беренче ярты еллыгына язылу да төгәлләнәчәк. Без сезне киләсе 2014 елда да «Якты юл» («Светлый путь») газеталары белән бергә калырга чакырабыз! Иске дус яңа 100 дустан да яхшырак дип юкка гына әйтмиләр бит. Почта бүлекләренә рәхим итегез.