«Чаллы яшелчәсе» хуҗалыгында көненә бер сыердан уртача 17 кг сөт савалар

Аерым хуҗалыкларга килгәндә, Сәйдәшев исемендәге хуҗалыкта бер сыердан уртача савым 6943 килограммга җиткән. «Ирек» җитештерү кооперативында бу күрсәткеч - 6106 , «Гигант» хуҗалыгында - 6027, «Чаллы яшелчәсе» хуҗалыгында - 5516 килограмм.

Гыйнвар аеның беренче ункөнлеге үтеп китте. Сыер савучылар елны ничек башладылар соң? Мәгълүматларга караганда, начар түгел. 10 гыйнварда районда тулаем 64,5 тонна сөт җитештерелгән. «Чаллы яшелчәсе», «Гигант», Сәйдәшев исемендәге хуҗалыклар, «Ирек» җитештерү кооперативы, «Вильданов» крестьян-фермер хуҗалыгы, «Ярыш» хуҗалыклары көнлек савымны арттыруга ирешкәннәр.

Терлекләре кышлатуга яхшы әзерләнгән, туклыклы өстәмәләр белән баетылган, аксымлы һәм витаминлы азыклары җитәрлек булган, рационда каралган азыкны төгәл итеп малларга ашаткан хуҗалыклар яңа елны да уңышлы башлап җибәрделәр. Мәсәлән, «Чаллы яшелчәсе» хуҗалыгында бер савым сыерга көненә 18,7 килограмм азык берәмлеге туры килә, ягъни 2 килограмм печән, 15 кг сенаж, 20 кг кукуруз силосы, 5 кг арпа һәм борчактан тартылган он, 1,5 кг түп (жмых), 10 кг чөгендер түбе (жом) бирелә. Баланслап ашаткач, нәтиҗәсе дә әйбәт. Бүген биредә бер сыердан уртача көнлек савым 17 килограмм тәшкил итә.

- Эшне зоотехния таләпләре кушканча төгәл оештырганда, кышын да күп сөт алырга була. Елны ничек башласаң, шулай дәвам итәрлек булсын, - ди «Чаллы яшелчәсе» хуҗалыгының баш зоотехнигы Наил Нуретдинов.