Көз җитү белән балаларның күпчелек вакыты мәктәпләрдә, балалар бакчаларында һәм төрле түгәрәкләрдә уза башлый. Салкынча һава торышы һәм температураның еш үзгәрүе дә гадәти күренешкә әйләнә. Бу чорда ата-аналар балаларда борынга томау төшү, ютәл һәм башка сулыш юллары инфекцияләре билгеләре белән еш очраша. Авыру куркынычын тулысынча бетереп булмаса да, аны киметергә һәм баланың организмына инфекцияләр белән көрәшергә ярдәм итәргә мөмкин.
Һава торышына карап киендерегез
Балаларны артык җылы киендерү — киң таралган хаталарның берсе. Балага эссе булса, ул тирләргә мөмкин. Ә аннары урамга чыккач, температураның кискен үзгәрүе организмга өстәмә уңайсызлык китерә.
Киемне һава торышына карап сайлау яхшырак. Салкын вакытта аякларның коры булуы аеруча мөһим. Аяк киеме дә температурага һәм явым-төшемле һава торышына туры килергә тиеш.
Шул ук вакытта бераз өшү генә салкын тиюнең төп сәбәбе була алмый. Сулыш юллары инфекцияләренең күбесен кешедән кешегә күчә торган вируслар китереп чыгара.
Саф һавада йөрү мөһим
Көз көне салкынча һавадан куркып, урамда йөрүдән тулысынча баш тартырга кирәкми. Бала үзен яхшы хис итсә, көчле яңгыр, җил яки бик түбән температура булмаса, көн саен саф һавада йөрү файдалы.
Өйдә бүлмәләрне даими җилләтеп тору да мөһим. Балалар бүлмәсендәге һавага аеруча игътибар бирергә кирәк: артык коры һәм кызу һава борын һәм тамакның лайлалы тышчасын киптерергә мөмкин.
Йокы һәм көн тәртибе
Йокының җитәрлек булмавы баланың кәефенә һәм гомуми хәленә тискәре йогынты ясарга мөмкин. Шуңа күрә уку елы башлану белән көн тәртибен җайга салу мөһим: баланы көн саен бер үк вакыт чамасында йокларга яткырырга һәм уятырга, өстәмә дәресләр белән артык йөкләмәскә, ял итү өчен дә җитәрлек вакыт калдырырга кирәк.
Дөрес һәм төрле итеп тукландыру
Баланың көндәлек рационында яшелчә, җиләк-җимеш, ярмалар, ит, балык, йомырка һәм организмга кирәкле матдәләр белән тәэмин итүче башка продуктлар булырга тиеш.
Аерым бер ризыкны «салкын тиюдән саклый» дип кабул итәргә кирәкми. Иң мөһиме — төрле һәм баланслы туклану, шулай ук ашаганда билгеле бер режимны саклау.
Витаминнар һәм башка өстәмәләрне табиб белән киңәшләшкәннән соң гына куллану яхшырак. Бу аеруча кечкенә яшьтәге балаларга кагыла.
Баланы гади кагыйдәләргә өйрәтегез
Күп кенә инфекцияләр куллар һәм якыннан аралашканда күчә. Шуңа күрә балага кечкенәдән үк гади кагыйдәләрне аңлату мөһим:
- кулларны сабын белән юарга;
- пычрак куллар белән биткә кагылмаска;
- башкаларның сөлгесен, савыт-сабасын һәм шәхси әйберләрен кулланмаска;
- ютәлләгәндә һәм төчкергәндә авызны һәм борынны капларга;
- авыру кешеләр белән мөмкин кадәр якын аралашмаска.
Бала үзен начар хис итә башласа, бу турыда өлкәннәргә әйтергә дә өйрәнергә тиеш.
Бала авырса
Борынга томау төшсә, ютәл, тамак авыртуы яки температура күтәрелсә, баланы «дәрес калмасын» дип мәктәпкә яки балалар бакчасына җибәрергә ярамый. Авыру вакытында организмга ял һәм тернәкләнү өчен вакыт кирәк.
Дәвалау авыруның сәбәбенә һәм баланың хәленә бәйле. Антибиотикларны һәм башка җитди препаратларны табиб билгеләмичә үз белдегең белән бирергә ярамый.
Баланың хәле начарайса, югары температура озак сакланса, сулыш алу кыенлашса, хәлсезлек, авырту яки башка борчулы билгеләр барлыкка килсә, медицина ярдәме сорарга кирәк.
Баланы «стериль» шартларда тотарга тырышмагыз
Баланы вируслардан тулысынча саклап булмый. Мәктәптә, балалар бакчасында, җәмәгать транспортында һәм төрле чараларда балалар бер-берсе белән аралаша. Шуңа күрә ата-аналарның төп бурычы — баланы әйләнә-тирәдән читләштерү түгел, ә аны сәламәт яшәү рәвешенә һәм файдалы гадәтләргә өйрәтү.
Йокы, дөрес туклану, физик активлык, саф һавада йөрү, бүлмәләрне җилләтү, шәхси гигиенаны саклау һәм артык йөкләнештән саклану — боларның барысы да балага көз айларын җиңелрәк үткәрергә ярдәм итә.
Нет комментариев