«Эссе» ял көннәре

1 мартта 8 сәгать 59 минутта кизү торучы пультына «Ивушка» бакчачылык ширкатендә бакча өендә янгын чыгу турында хәбәр килә.  Янгыннан 10 кв. м мәйдан зыян күрә. Бакча йорты иминиятләштерелмәгән. Янгын сүндерүчеләр сүзләренчә, янгынның сәбәбе – мич җиһазларының төзек булмавы.

2 март көнне 3 сәгать 58 минутта Иске Ерыклы авылында шәхси йортта янгын чыга. Нәтиҗәдә 120 кв.м йорт тулысынча янып бетә. Йорт 1960 елда төзелгән. Бәхеткә каршы, ул иминиятләштерелгән була.  Янгынның сәбәбе – электр җиһазларын монтажлау кагыйдәләрен бозу.

Шул ук көнне кич белән 20 сәгать 36 минутта «Татарстан» совхозы поселогында мунча януы турында хәбәр килә. Янгын нәтиҗәсендә 6 кв.м  мунчаның эчке тышлыгы янып бетә. Янгынның сәбәбе  – бинаның төтен торбасыннан түшәмгә кадәр тиешле ара сакланмаган, дип хәбәр итте күзәтчелек эшчәнлеге һәм профилактика эше бүлеге инспекторы Эльвира Краснова.

Фото Эльвира Красновадан алынды.