Тукай районында исерек килеш кабат руль артына утырган 38 яшьлек хатын-кызга карата җинаять эше судка җибәрелде. Ул моңа кадәр дә исерек хәлдә машина йөрткән өчен административ җаваплылыкка тартылган булган.
Тукай районы прокуратурасы Яңа Ерыклы авылында яшәүче 38 яшьлек хатын-кызга карата кузгатылган җинаять эше буенча гаепләү актын раслады. Ул РФ Җинаять кодексының 264.1 маддәсенең 1 нче өлеше (административ җаваплылыкка тартылган затның исерек хәлдә транспорт чарасы белән идарә итүе) буенча гаепләнә.
Тикшерү материаллары буенча, 2025 елның маенда әлеге хатын-кыз административ җаваплылыкка тартылган булган инде. Исерек хәлдә машина йөрткән өчен аңа 45 мең сум күләмендә штраф һәм 1 ел 6 айга транспорт белән идарә итү хокукыннан мәхрүм итү җәзасы билгеләнгән.
Шулай да, гамәлдәге чикләүләргә карамастан, 2026 елның 24 гыйнварында кич белән ул кабат исерек килеш «ВАЗ-21099» автомобиле руле артына утыра һәм Чаллы шәһәренә барырга чыга. Юлда аны ЮХИДИ хезмәткәрләре туктата һәм транспорт чарасы белән идарә итүдән читләштерә. Автомобиль Чаллы шәһәрендәге махсус штрафстоянкага урнаштырыла.
Хатын-кыз үзенең гаебен тулысынча таныган. Җинаять эше судка җибәрелгән.
Нет комментариев