Тукай районының Меләкәс авылы мәдәният йортында махсус хәрби операциядә катнашучы якташларыбызга ярдәм йөзеннән «Үзебезнекеләрне ташламыйбыз» дигән зур хәйрия концерты узды. Чараның төп вакыйгасы һәм тамашачыларны иң дулкынландырган мизгеле булып балалар чыгышы торды.
«Волшебная страна» балалар үзәгендә тәрбияләнүче 4 яшьтән 14 яшькә кадәрге балалар сәхнәгә җырчы Илзирә белән бергә чыгып, «Җиңү таңы» җырын башкарды. Сабыйларның ихлас чыгышы, җыр аша Ватанга мәхәббәтләрен белдерүе залда утыручыларны битараф калдырмады. Күпләрнең күзләренә яшь килде. Балаларның концертта катнашуын тәэмин итү өчен аларны Чаллыдан Мәләкәс авылына махсус транспорт белән алып килгәннәр.
Бу чыгыш аеруча дулкынландыргыч булды, чөнки сәхнәгә чыккан нәниләрнең һәрберсе артында үз гаилә тарихы тора. Кечкенә артистлар арасында беренче сыйныф укучысы да бар иде, аның әтисе мобилизациянең беренче көненнән үк алгы сызыкта хезмәт итә. Күптән түгел ул яраланган һәм хәзерге вакытта хәрби госпитальдә дәвалана. Кызның әнисе сүзләренчә, бала әтисенең кайда булуын яхшы аңлый һәм уртак Җиңүнең якынлашуын бөтен күңеле белән көтә.
Хәйрия концертында шулай ук Нияз Хәмәтшин, Алина һәм Дина Гарифуллиналар һәм башка артистлар чыгыш ясады. Алар тамашачыларга үзләренең җырларын бүләк итеп, чарага җылы һәм тәэсирле рух өстәде.
Нет комментариев