Татарстанда мөмкинлекләре чикләнгән балаларның ата-аналарына 4 өстәмә ял көне бирелә

Бу көннәр өчен түләүне эш бирүче хезмәткәрнең уртача хезмәт хакы нигезендә башкара, ә соңыннан чыгымнарны Татарстан буенча Социаль фонд бүлеге каплый.

2026 ел башыннан фонд әлеге максатларга 297 миллион сумнан артык акча юнәлткән. Өстәмә ял көннәре ата-аналарның берсенә бирелә, икенче ата-ананың эшләве яки эшләмәве исәпкә алынмый.

Әйтик, әни кеше бала карау буенча ялда булса яки вакытлыча эшләмәсә, эшләүче әти бу мөмкинлектән файдалана ала.

Өстәмә ял көннәрен рәсмиләштерү өчен ата-ана, опекун яки попечитель эш бирүчегә язма гариза тапшырырга тиеш. Әгәр баланың ике ата-анасы да рәсми рәвештә эшли икән, гаризага икенче ата-ананың бу ял көннәрен кулланмавы яки өлешчә файдалануы турында белешмә дә кушыла.

Тиешле ял көннәрен әти белән әни үзара бүлешә ала яки аларның берсе генә куллана ала. Шулай ук ял көннәрен ай саен алу яки ел дәвамында 24 көнгә кадәр җыеп, берьюлы файдалану мөмкинлеге бар. Соңгы очракта график эш бирүче белән алдан килештерелергә тиеш.

Җыелган өстәмә ял көннәрен шул ук календарь елында кулланырга кирәк. Аларны киләсе елга күчерү яки акча белән алыштыру мөмкин түгел.

«Өстәмә түләүле ял көннәре еллык түләүле ял, хезмәт хакын сакламыйча алынган ял яки 3 яшькә кадәрге бала карау буенча ял чорында бирелми. Әмма бу вакытта икенче ата-ананың дүрт өстәмә түләүле ял көненә хокукы саклана», — дип аңлатты Татарстан буенча Социаль фонд бүлеге идарәчесе Эдуард Вафин.

Чыганак/ РФ Социаль фонды ТР бүлекчәсе