Тизрәк, җитезрәк, кызурак. Яңа поселогында «Милләтләр кроссы – 2013» узды

Йөгерештә иң күп катшашучылар арасында Круглое Поле поселогы (529 кеше), Бәтке (358 кеше), Кнәз (355 кеше) авыллары.

Яңа поселогында үткән спорт бәйрәмен район мәгариф бүлеге башлыгы Рамил Исаев ачып җибәрде. Ул, катнашучыларны котлап, барысына да уңышлы старт һәм җиңүле финиш теләде. Соңыннан сүзне район яшьләр эшләре, спорт һәм туризм бүлеге башлыгы Илнур Гәрәев алды. Ул шулай ук йөгерешкә килгәннәргә яхшы кәеф һәм җиңү теләде.

Ярышларда район җитәкчелеге, «Шәфкать» халыкка социаль ярдәм күрсәтү оешмасы, пенсия фонды белгечләре, мәгариф бүлеге, район яшьләр эшләре, спорт һәм туризм бүлеге хезмәткәрләре, шулай ук Яңа поселогы мәктәп укучылары, укытучылар, балалар бакчасында тәрбияләнүчеләр, ФАП, клуб хезмәткәрләре һ.б. катнашты. Йөгерешчеләр төрле озынлыктагы дистанция үттеләр. Кечерәкләр кыска арага йөгерсә, зурраклар ераграк арага чапты. Әлеге спорт ярышларында иң активларның берсе булган район хакимияте җитәкчелеге 2014 метрлы иң озын дистанцияне үтте.

Көн салкын булуга карамастан, Яңа поселогында барлыгы 173 кеше йөгерешкә чыкты. Алар арасында «кросста мин дә катнашам» дип торган иң кечкенә катнашучылар да бар иде. Әле яңа гына 4 яшен тутырган Тимур Әхмәтсафин да шундыйлардан. Йөгерешкә ул әнисе - Яңа поселогы балалар бакчасында тәрбияче булып эшләүче Наталья Әхмәтсафина белән килгән иде.

- Ярышларда катнашырга улым үзе теләк белдерде. Шуңа да йөгерешкә икәүләп килдек, - диде миңа кечкенә Тимурның әнисе.

«Милләтләр кроссы - 2013» кысаларында узган йөгереш тәмамлану белән, бүләкләү тантанасы булды. Һәрбер дистанция буенча җиңүчеләрне атап киткәннән соң, «Бердәм Россия» сәяси фиркасенең җирле бүлекчәсе исеменнән йөгерештә катнашкан иң кечкенә һәм иң олы йөгерешчеләрне аерым бүләкләделәр. 59 яшен тутырган Мансур Гайнетдинов һәм Яңа поселогында ФАП хезмәткәре булып эшләүче әнисе Гөлгенә Садретдинова белән бергә килгән 3 яшь 10 айлык Азалия «Бердәм Россия» сәяси фиркасенең махсус бүләгенә лаек булдылар.