Мәдәният учаклары гөрләп эшләп торсын

Бина 2000 квадрат метр җирне били һәм аны төзүгә республикадан барлыгы 11 миллион 200 мең сум акча бүлеп бирелгән. Бүген инде бинаның кирпеч стеналары күтәрелгән, түбәсен ябасы, эчке эшләрне башкарасы бар.

- Бу бинада клуб белән фельдшер-акушерлык пункты урнашачак. ФАПка һәм клубка керү ишекләре аерым булачак, - диде мәдәният йорты директоры Флера Шәрипова.

Мин килгән көнне ФАП буласы җирдә «Евростиль» төзү оешмасының ташчылары Александр Вәлиев белән Вячеслав Архипов эшлиләр иде. Төзелеш, ремонт эшләре болай матур гына бара.

- Таләпләргә туры китереп эшлибез. Бина бит халыкка озак хезмәт итәргә тиеш, - диләр егетләр.

- Менә монда тамаша залы булачак. Ул 300 урынга исәпләнгән. Биредә - сәхнә. Анда районыбызның үзешчән коллективлары гына түгел, республикадан килгән артистлар да чыгыш ясар әле, - ди клуб мөдире. - Әле күптән түгел генә грим ясау бүлмәләрен бүлеп куйдылар: монда хатын-кызлар һәм ир-атлар өчен аерым бүлмәләр булачак, - дип дәвам итте ул.

- Эшләр бик күп әле. Ләкин барысын да билгеләнгән вакытка башкарып чыгарга ниятлибез. Хәзер менә түбә ябабыз. Монда барлыгы 6 ир-ат эшли. Ялсыз эшләргә туры килсә дә, егетләребез зарланмый, - диде миңа бригадир Александр Музлов.

- Круглое Поле зур поселок. Әлбәттә, биредә яңа мәдәният йорты бик кирәк иде. Аны зурлап ачарга исәплибез. Тантанада балалар сәнгать мәктәбе укучылары, шулай ук районыбыз иҗат һәм фольклор коллективлары чыгыш ясар дип көтелә. Бу чарага әзерлек эшләрен алып барабыз, - диде район мәдәният бүлеге башлыгы Алсу Җаббарова.

Сүз уңаеннан, шимбә көнне Хөкүмәт йортында ТР Президенты Рөстәм Миңнеханов үткәргән киңәшмәдә авылларда төзелгән мәдәният йортлары турында да сүз булды. Рөстәм Нургали улы әлеге программа буенча сафка бастырылган яңа социаль-культура объектларында эшнең оештырылмавын тәнкыйтьләде. Сигналлар социаль челтәрләр аша килгән, тикшерүләр чынлап та бу клубларда чаралар үткәрелмәвен раслаган.

- Яңа авыл клублары, ФАПлар төзелгән, ләкин аларда эш алып барылмый, чаралар үткәрелми, түгәрәкләр эшләми, шөгыль клублары юк. Яңа биналар һәйкәл сыман гына торалар, - диде Президент.

Мәдәният учаклары, клублар халыкка хезмәт итсен, диде Рөстәм Нургалиевич. Клубта җыр, музыка, бала-чага чыр-чуы, күңелле биюләр тынып тормасын иде.

Круглое Поледа төзелә торган яңа мәдәният йорты да гөрләп эшләп торыр дип ышанасы килә.