Тукай районыннан МХО ветераннары Фәнис Галимуллин һәм Иван Лёвкин Казанда узган патриотик һәм мәдәни чараларда катнашты. Сәфәр «СВОлылар өчен тур» Бөтенроссия социаль туристик маршруты кысаларында оештырылды.
Өч көн дәвамында ветераннар өчен төрле чаралар, очрашулар һәм экскурсияләр оештырылды. Беренче көнне алар «Ватанның хатын-кызлар канаты» форумында катнашты, Иске Татар бистәсе һәм Казан вертолет заводы буенча экскурсиядә булды. Икенче көнне ветераннар V Казан глобаль яшьләр саммитында катнашты, чын сугыш эпизодын чагылдырган «Буыннар бәйләнеше» хәрби-тарихи реконструкциясен карады һәм «Добробат» төркеме концертында булды.
Сәфәрнең соңгы көне «Казан күпкырлы» этнографик экскурсиясе белән башланды. Ветераннар барлык диннәр гыйбадәтханәсе һәм Казан Кремле белән танышты. Шулай ук алар «Ике Кремль» мотойөрешенең башлануын тамаша кылды, «Туган Авылым» милли комплексында булды, бәйрәм ат чабышларын карады. МХО ветераннары Татарстан Республикасы һәм Казан шәһәре көненә багышланган төп бәйрәм чараларында катнашып, шәһәрнең бәйрәм рухын тоя алды. Сәфәрнең матур мизгелләренең берсе теплоходта елга буйлап сәяхәт булды. Кичен исә ветераннар бәйрәм салютын көймә бортыннан тамаша кылып, төнге Казанны күзләде.
Майор Фәнис Галимуллин мобилизациянең беренче көненнән үк фронтка киткән. Авыр яралануга карамастан, ул сугышчылар белән җитәкчелек итүен дәвам иткән ветеран. Запастагы капитан Иван Лёвкин да фронтка үз теләге белән киткән. Авыр яраланудан соң аягын югалтса да, ул спорт белән шөгыльләнә, медальләр яулый һәм киләчәктә башка ветераннарга ярдәм итәргә ниятли.
Проект Россия халыклары бердәмлеге елы дип игълан ителгән 2026 ел кысаларында тормышка ашырылды һәм МХО ветераннарын социаль-мәдәни һәм психологик яктан тернәкләндерүдә үзенең нәтиҗәлелеген күрсәтте.
"Якты юл" газетасына язылыгыз һәм Тукай районындагы яңалыкларны, вакыйгаларны белеп торыгыз
Нет комментариев