Татарстанда республика көне уңаеннан ял итмичә эшләгән хезмәткәрләр сентябрьдә арттырылган хезмәт хакы алачак. 30 августта эшләгән кешеләргә бәйрәм көнендәге хезмәт өчен түләү гадәти көндәгедән кимендә ике тапкыр югарырак булырга тиеш.
Мондый тәртип Россия Хезмәт кодексының 153нче маддәсе белән каралган. Ягъни эш графигы буенча республика бәйрәме көнне эшләүченең хезмәт хакы арттырылган күләмдә исәпләнә.
Әмма монда бер мөһим нюанс бар. Кеше 30 августта тулы смена түгел, ә берничә сәгать кенә эшләгән икән, икеләтә түләү дә шул вакыт өчен генә бирелә. Эш урынында булмаган сәгатьләр өчен өстәмә түләү каралмый.
Хезмәткәрнең тагын бер мөмкинлеге бар: ул акчалата компенсация урынына өстәмә ял көнен сайлый ала. Бу очракта 30 августтагы хезмәт өчен аңа бер тапкырлык тариф буенча түләнә, ә соңрак ял итү өчен өстәмә көн бирелә.
Шулай итеп, бәйрәм көнендә эшләгән хезмәткәр сентябрьдә хезмәт хакы исәпләнгәндә үзенә тиешле өстәмә түләүне күрә ала.
"Якты юл" газетасына язылыгыз һәм Тукай районындагы яңалыкларны, вакыйгаларны белеп торыгыз
Нет комментариев