Югары Байларда үткәннәрне искә алдылар

Югары Байлар авылында бәйрәм чарасын имам-хатыйп Харис хәзрәт үзенең догалары белән ачып җибәрде. Аннары яу кырында һәлак булган авылдашлар рухына дога кылдык һәм аларны бер минут тынлык белән искә алдык. Тантанага җыелганнарны Күзкәй авыл җирлеге башлыгы Эдуард Гәрәев тәбрикләде. Мәктәп укучылары әдәби-музыкаль монтаж барышында сугыш елларына багыш-ланган тетрәндергеч шигырьләр сөйләделәр.

Авылдашыбыз Сәлимә апа солдат боткасы пешерде. Бәйрәмчә әзерләнгән өстәлдә чишмә суыннан куелган самовар чыжлап торды, авылдашлар чәкчәк, бәлеш, коймак белән сыйланды, яу кырында ятып калган әби-бабалары, әти-әниләре һәм туганнары турында әңгәмә корды.

Әлеге бәйрәмне оештыручы клуб мөдире Әлфия Дөльфануровага, китапханә мөдире Гөлсинә Хаҗиевага халык зур рәхмәтле. Бәйрәмнән барысы да канәгать калдылар, дип яза редакциягә Алсу Хәмәтова.