Тукайлылар агачларны кисүне, клуб төзүне сорыйлар

Яңа Мусабай авылыннан Гаделова фамилияле ханым редакциягә ике сорау белән мөрәҗәгать итте. «Авылыбыз көннән-көн зурая, төзекләнә. Шул ук вакытта борчыган мәсьәләләр дә бар. Авылның түбән очында ике зур агач бар. Бик карт агачлар болар. Катырак җил иссә, алар аварга, туп-туры электр баганалары өстенә төшәргә мөмкиннәр. Чыбыкларны өзеп, авылны утсыз калдырачаклар. Тагын бер сорау: безнең авылга яңа клуб кирәк. Булыр микән ул, программага кертелер микән?» - дип яза ул.

Беренче сорауны без Түбән Суыксу авыл җирлеге башлыгы Наис Сәйфетдиновка җиткердек. «Без авыл эчендә үсүче агачларны һәрдаим карап торабыз. Куркыныч тудыра икән - кисәбез. Яңа Мусабайда андый агачлар юк дип беләм. Урынга чыгып, тагын бер кат тикшерербез. Әгәр авария тудырырга мөмкин дип табыла икән - кисәрбез», - диде ул. Клубка килгәндә, район мәдәният бүлеге башлыгы Алсу Җаббарова, Яңа Мусабай авылын, кызганычка каршы, әлегә клублар төзү программасына кертү мөмкинлеге юк дип белдерде.