Чаллыда батутта егылган хатын-кызны яңа ысул белән дәвалаганнар
Р. С. Акчурин исемендәге Ашыгыч медицина ярдәме хастаханәсе кардиохирурглары Татарстанда беренчеләрдән булып йөрәк клапанын дәвалауда заманча миниинвазив технология кулланды.
Яңа алым ярдәмендә табиблар Аэлита исемле пациентка катлаулы операцияне зур кисемсез, кечкенә генә тишем аша башкарган. Хатын-кыз берничә ай элек күңел ачу үзәгендәге батутта егылып имгәнгән булган. Башта ул моңа җитди игътибар бирмәгән, аркасы гына бераз авыртып йөргән.
«Батут үзәгендә уңайсыз гына егылып төштем. Башта көчле авырту сизмәдем, аркам гына сызлап торды. Ә биш айдан үпкә ялкынсынуы белән хастаханәгә эләктем. Тикшерү вакытында йөрәгемнең зурайганы ачыкланды», — дип сөйләгән Аэлита.
Тикшерүләр нәтиҗәсендә пациентның митраль клапаны зарарланган булуы ачыкланган. Бу җитди авыру йөрәк эшенә өстәмә йөк сала һәм вакытында дәвалауны таләп итә.
Операция барышында табиблар зарарланган клапанны алыштырган, шулай ук йөрәк ритмын торгызу өчен криоабляция ысулын кулланган. Яңа технология операциядән соң пациентның тизрәк аякка басуына һәм мөмкин булган өзлегүләрне киметергә ярдәм итә.
Бүген Россиядә мондый заманча алымнарны санаулы медицина үзәкләре генә куллана. Татарстандагы Ашыгыч медицина ярдәме хастаханәсе дә йөрәк хирургиясендә алдынгы технологияләрне үзләштерүче клиникаларның берсе булды.
Чыганак/ Интертат
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев