Тукай районы Мәләкәс авылында 22 яшьлек егет мотоцикл белән әйләнгән

Мотоцикллар катнашындагы юл-транспорт һәлакәтләре теркәлә башлады. 22 май көнне шундый очракларның берсе Мәләкәс авылының Үзәк урамында булды. «Евротех Буллит» мотоциклына утырган 22 яшьлек егет тизлекне арттыра һәм, идарә итүне югалтып, юлда әйләнә. Йөртүченең стажы 4 ел, юл йөрү кагыйдәләрен бозган өчен быел 4 мәртәбә административ җаваплылыкка тартылган. Мотоцикл теркәлмәгән, йөртүченең руль артына утырырга хокук бирүче таныклыгы да, ОСАГО полисы да булмаган, шулай ук егет мотошлем да кимәгән булган. Бүген транспорт чарасы штрафстоянкага куелган, ә төрле тән җәрәхәтләре алган йөртүче больницада, дип хәбәр итәләр район буенча ЮХИДИ бүлегеннән.