Балаларны хәзер үзләрен генә машинада калдырырга ярамый

7 яшькә кадәрге балаларны, элеккеге кебек үк, җиңел автомобильдә һәм йөк машинасының кабинасында мәҗбүри рәвештә креслоларда һәм утыргычларда йөртергә кирәк. 7дән 12 яшькә кадәр булган балаларны арткы утыргычларда куркынычсызлык каешы белән генә дә йөртергә ярый, ләкин баланың авырлыгы һәм буе кечерәк булса, креслога яки утыргычка да утыртырга була. Ә машинаның алгы утыргычында 12 яшькә кадәрге балалар креслоларда яки утыргычларда гына алып барылырга тиеш. Җиңел машинада да, йөк автомобиленең кабинасында да балалар утыргычларының тиешле таләпләргә туры китереп беркетеп куелган булулары шарт.

Икенче кагыйдә - РФ Юл йөрү кагыйдәләренең 12.8 пунктына яңа абзац өстәлде: хәзер 7 яшькә кадәрге балаларны туктап торган машинада үзләрен генә калдырып китәргә ярамый.

«Вконтакте» социаль челтәрендә редакция бу темага сораштыру да үткәргән иде. Без кулланучыларга: «Сез балаларны автомобильдә алып бару кагыйдәләрен үтисезме?» дип сорау бирдек. Аннан күренгәнчә, җавап бирүчеләрнең 64 проценты: «Әлбәттә, бу бит балаларның куркынычсызлыгы!» дип белдерде, 11 проценты - ЮХИДИ хезмәткәрләре булганда гына, 7 проценты шәһәрдә генә кагыйдәләрне үтәвен әйтте, 4 процент кеше кагыйдәләрне үтәмим диде, 10 процент - машинам юк, 1 процент балаларым юк, дип җавап бирде.