«Ярыш» яхшылар рәтендә

Язгы кыр эшләренә әзерлекләрен белешү максатыннан «Ярыш» хуҗалыгы җитәкчесе Расим Шәйхаттаровка шалтыраттык. «Кыр эшләрендә катнашачак техника, тагылма инвентарь әзер. Шулай да механизаторлар аларны, буразнада сынатмасыннар өчен, кат-кат күздән кичерә, хәзер аларны комплектлаштыру бара. Быел кыш хафалырак булды - кар эреп, боз катламнары барлыкка килде. Көзге бодай уҗымын алып карадык, болай исән сыман, арыш та әйбәт кышлаган. Бу язда 2 мең гектар иген - бодай, арпа, солы чәчәсе бар. Орлык кирәкле күләмдә. Аны, әлбәттә, агулап чәчәбез. Хәзергә орлык агулауга керешергә иртәрәк - һаваның җылынганын көтәбез. Бу көннәрдә орлыкны җилләттек, ягъни «йокыдан уяттык», сыйфаты әйбәт. Дөресен генә әйткәндә, имтихан алдыннан кебек - дулкынландыра. Һава шартлары нинди булыр дип борчылабыз. Орлыкны вакытында җир куенына салу кирәк бит. Кадрлар бар, - диде ул.