Тукай районында бассейн төзеләчәк

140 млн сумлык әлеге проект Круглое Поле поселогында гамәлгә ашырылачак. Объектка август ахырында нигез салыначак. Республикада быел гына эшли башлаган бу программага 8 муниципаль район кертелгән, шуларның берсе - Тукай районы. Объект Круглое Поленың ял паркы янындагы мәйданында урнашачак. Проект буенча, биредә өлкәннәр өчен 25кә 8,5 метр һәм балалар өчен 10га 6 метр зурлыктагы аерым йөзү ванналары куелачак, һәрберсендә душ кабиналары, өлкәннәр өчен 20шәр урынлык ике чишенү-киенү бүлмәсе, балалар өчен 9ар урынлык шундый бүлмәләр, инвалидлар өчен универсаль кабиналар төзү каралган. Бассейнда дежур шәфкать туташы эшләячәк. Объектны куллануга тапшыру 2018 елның мартына планлаштырыла.