Киләчәк тормыш безнең кулларда

Кнәз авылының мәдәният йортында «Киләчәк тормыш безнең кулларда» дигән исем астында яшь сайлаучылар белән очрашу узды. Әлеге чарага Кнәз авылы яшьләре һәм яшүсмерләре, шулай ук сайлау хокукы кызыксындырган барлык кнәзлеләр җыелган иде.

Очрашуның максаты - Кнәз авыл җирлеге яшьләрендә авылның иҗтимагый-сәяси тормышында катнашу теләген уяту, булачак сайлаулар турында тулырак мәгълүмат җиткерү. Чарада яшьләр белән кызыклы әңгәмә дә оештырылды.

Барча җыелганнар бик теләп, мәдәният йорты хезмәткәрләре тарафыннан әзерләгән «Яшьләр һәм сайлаулар» дигән викторинада да катнашты. Яшьләр үзләренең сайлау хокуклы булганнарын белеп торырга, аларның сайлауларыннан үзләренең киләчәк тормышлары гына түгел, дәүләтнең дә киләчәге бәйле булуын белеп торырга тиеш. Кнәз авыл җирлеге яшьләре викторинада да, файдалы әңгәмәдә дә бик теләп катнашты, булган сорауларын бирде, бер-берсе белән фикер алышты, дип язды Кнәз мәдәният йорты директоры Тамара Тузеева.