Казанда узган Дөнья Чемпионатының ачылыш тантанасы турында сез нинди фикердә?

Рима Волкова, Новотроицкое авыл җирлеге башлыгы: Дөресен генә әйткәндә, күргән тамашадан әле дә тәэсирләрем ташып тора. Оештыручыларның шундый зур чараны оста итеп үткәрүләре, бизәлеш, артистларның костюмнары - һәркайсы күңелдә соклану, кабатланмас кичерешләр калдырды. Аннары безне озатып йөргән волонтерларның эшенә дә югары бәя бирер идем мин. Утырасы урыннарыбызга кадәр озатып, һәр соравыбызга җавап бирделәр, итагатьле мөнәсәбәттә булдылар. Башкалабыз исә тагын да матурланган, купшы күлмәк кигән. Үзебезнең республика белән горурланып утырдым.

Салават Шәрипов, Күзкәй авылы: Дөнья чемпионатының тантаналы ачылу вакыйгасы миндә әйтеп бетергесез эз калдырды. Шоуның үзе турында әйтеп тә торасы юк! Махсус эффектлар, заманча технологияләр кулланып ясалган сәхнә барча кешене әкият илендә «йөздерде». Үземә шәхсән дельфиннарны саклау, аларны яклау куелышы (постановка) ошады. Шулай ук җырчы Алена Тойминцева чыгышын атап үтәсем килә. Ул үзенең энергетикасы белән залны тагын да җанландырып җибәрә алды. Сүз уңаеннан, Тукай районы администрациясе хезмәткәрләренә безне шундый дөньякүләм чарага алып барганнары өчен рәхмәт әйтәсем килә.

Лилия Минһаҗева, Иске Абдул авылы: Барысы да ошады: артистлар чыгыш ясаган сәхнә шарлавык формасында иде, алар агып торган су өстендә басып җырлаган кебек күренде, ә шоу турында әйтеп бетерерлек кенә түгел! Минут эчендә зал әллә ничә төскә керде, чыгышлар да искиткеч матур булды. Биючеләр, җырчылар, гомумән, барлык катнашучылар да үз рольләрен җиренә җиткереп башкардылар. Шундый дөньякүләм чарада катнашуым - хәтеремдә мәңгегә сакланып калачак.