Фотоконкурста катнашырга ашыгыгыз

Район яшьләр эшләре, спорт һәм туризм бүлеге белгечләре «Авыл яшьләренең яшәеше» дип аталган фотоконкурс игълан итүе турында хәбәр итә. Бәйгедә 14тән алып 35 яшькә кадәр җиткән, Тукай районында пропискада булган яшьләр катнаша ала. Конкурста бары тик фотографияләрне үзе төшереп җибәрүче генә катнаша (фотографиядә автор үзе сурәтләнә алмый). Иң мөһиме: бөтен фотосурәтләр дә быел гына, ягъни фотоконкурс игълан ителгән вакытта гына ясалырга тиеш. Бер кешедән 5тән артык фото алынмый.

Конкурс үткәрү вакыты - 13нче гыйнвардан алып 31енә кадәр. Бәйгегә фото җибәргәндә бераз гына фото төшерелгән вакыйганы, шулай ук үзегезнең исем-фамилияне, авылны язып китү мәслихәт. Жюри әгъзалары фотоларның сыйфатына, үзенчәлекле булуына игътибар итәчәк. Фотоларны район яшьләр эшләре, спорт һәм туризм бүлегенең «Вконтакте» социаль челтәрдәге рәсми төркеменә (https://vk.com/otdel_molodezhy_tuk), «Фотоконкурс» дигән альбомына җибәрергә кирәк. Җиңүчеләрне акчалата бүләкләр көтә, катнашырга ашыгыгыз.