Бордыбаш авылында яшәүче Шакировлар хуҗалыгында матур чәчәкләр генә түгел, яшелчә солтаны – шпинат та үсә
Район яшьләр эшләре, спорт һәм туризм, районның мәдәният бүлекләре авылда яшәүче яшь гаиләләр арасында «Иң яхшы хуҗалык» бәйгесен игълан итүләре хакында үткән саннарның берсендә хәбәр иткән идек. Бу атнада комиссия авыл җирлекләренә чыгып, конкурста катнашырга теләк белдергән хуҗалыкларны карап йөри башлады. Иң беренчеләрдән булып, алар Борды җирлегендәге Борды, Бордыбаш авылларында...
Шакировларның йортлары Бордыбашка килеп кергәч тә әллә каян үк күренеп тора. Капка янында матур итеп ясалган балалар өчен комлык, йорт алдында аллы-гөлле чәчәкләр, әкияти сыннар да күз явын алып, үзенә тартып тора. Капкадан ишегалдына үткәч тә, чәчәкләрнең койма яннарында ак, сары, кызыл, зәңгәр төсләрдә утыруы да күңелгә хуш килә. Шул арада комиссияне озатып йөрүче җирлек башлыгы Роза Әбделманова үзенең көр, яңгыравык тавышы белән хуҗаларга дәшә. Тавышка, бакча ягыннан ашыга-ашыга бер хатын-кыз килеп чыга. Илдар Шакировның әнисе Гөлфия ханым икән.
- Балалар шәһәрдә, эштә иделәр шул, - ди ул. - Хуҗалыкны үзем генә күрсәтсәм инде.
Аның белән бергә бакча ягына юл алабыз. Нәрсә генә үсми биредә! Һәр бакчада матур рәт белән үсеп утырган бәрәңгедән, кишер, суган, кәбестә ише яшелчәдән тыш, тимерга бай булган шпинат үләне, көнбагыш, мелисса да үсә.
Аннары хуҗабикә безне теплицага алып керә. Түшәмгә кадәр үрелеп үскән помидорлар белән бергә күңелле күч булып утырган борычлар - ымсындырып утыра.
- Мал асрамыйбыз, асравын. Аның каравы, җәй буе умарта кортлары белән мәш киләбез, - ди Гөлфия Бариевна, бакчада тезелеп куелган умарта ояларына ишарәләп. - Аларга бар вакытыбыз багышланган. Улыбыз Илдар, киленем Зилола, өч оныгым белән һәрвакыт бал кортлары, бакча, йорт янында кайнашабыз. Вакытыбыз бер дә буш узмый, - диде ул.
Моның шулай икәне әллә каян күренеп тора. Шакировларның ихаталарында йөргәндә без бер генә чүп, төзексез җир дә күрмәдек. Тиешле жирдә аллы-гөлле бакча чәчәкләре, җиләк-җимеш, яшелчәсе үсеп утыра. Кайчандыр сатып алынган шыксыз гына бер йорттан да алар чын мәгънәсендә кәнфит ясаганнар. Йорт тышыннан да, эченнән дә курчак өе сыман искиткеч матур. Алай гына да түгел, хәтта эш кораллары торган сарай бүлмәләре дә өйдәге сыман чип-чиста, якты.
Матурлык уңган, алтын куллы кешеләрне ярата. Биредә, чыннан да, бар яктан да килгән, булган кешеләр яши икән дип Шакировлар гаиләсенә, аларның йорт-җиренә чын күңелдән сокланып кайтыр юлга кузгалдык.
Киләсе саннарның берсендә сезгә Борды авылында яшәүче күп балалы Трониннар гаиләсе, аларның хуҗалыклары турында сөйләрбез.
Следите за самым важным и интересным в Telegram-каналеТатмедиа
Нет комментариев