Киләчәк пенсияне мәктәптән үк кайгырта башлыйлар

Күркәм гадәткә әйләнгән әлеге чара һәр елдагы кебек үк быел да район мәктәпләрендә шаулап үтә. Мәктәп бусагасыннан чыгып һөнәр алганчы, киләчәк пенсияне туплау, аның төрләре турында ныклап белү бик тә файдалы.

Районның Пенсия Фонды идарәсе җитәкчесе вазифасын башкаручы Фәридә Әгъләҗева белән белгечләрнең дә фикере шундый. Нәкъ шуңа күрә, ел саен биредә эшләүчеләр мәктәпләргә чыгып, өлкән сыйныф укучылары белән пенсия темасына багышланган дәресләр уздыралар. «Пенсия турында нәрсә генә сөйләргә мөмкин соң?» - дигән сорау туарга мөмкин. Бик дөрес һәм урынлы ул. Әлеге дәресләр вакытында балаларга күпкырлы белем бирәләр. Әйтик, РФ Пенсия Фонды эшчәнлеге, хезмәт пенсияләренең төрләре белән таныштыралар, бергә утырып, пенсиянең тупланма өлешен финанслау өчен заманча инвестицияләр ясау мөмкинлекләрен өйрәнәләр. Моннан кала, укучыларга киләчәк пенсияне өстәмә финанслау буенча дәүләт программасы турында да мәгълүмат бирәләр. Әлеге белемнәрне җиңел һәм мавыктыргыч итеп кабул итү максатыннан мондый очрашулар өчен махсус эшләнгән видеофильм күрсәтү чараны кызыклы итә. Кыскасы, бүген район мәктәпләренең өлкән сыйныф укучылары үзләре өчен дә, әти-әниләренә дә файдалы булган белем алды.