Бордыда Май чабу бәйрәме үтте

Якшәмбе көнне бордылылар барысы да шат күңелле, матур итеп киенеп, бәйрәм мәйданына җыелды. Урамда кайнар коймак пешеп, хуш исле чәй кайнап торды. Балалар Кыш бабай белән саубуллашыр алдыннан аның капчыгыннан матур-матур бүләкләр, тәмле күчтәнәчләр алдылар. Төрле кызыклы, мавыктыргыч уеннар оештырылды. Аркан тарту буенча урамлап ярыштылар. Икенче ел рәттән бу бәйгедә Гагарин урамында яшәүчеләр җиңде. Бәйрәмнең тагын бер күңелле мизгеле - "тәгәрмәч уены" булды. Анда бала-чагасы, олысы - һәммәсе катнашты. Ир-атлар чуман чәнәшкәсен әйләндерә-әйләндерә тәмам арыды, бик күп кызыклы уеннар уйналды. Аннан соң Кыш бабай үзенең урынын Язсылуга тапшырды. Бәйрәмнең иң төп йоласы - "җазыклар карачкысы" яндырылды.

Урамда җыр-моң кичкә кадәр тынып тормады. Борды халык фольклор ансамбле үзенең дәртле җырларын башкарды. Бәйрәмне оештыруда Борды авыл җирлеге Советы депутаты, эшмәкәр Валерий Мансуров ярдәм итте. Бу көнне авылга кунакка кайтканнар арасында Николай атакай, Чиләбе кунагы - Нагайбәк керәшеннәренең атаман ярдәмчесе Александр Теряков та бар иде. Алар да безнең авылда узган бәйрәмне хозурланып, рәхәтләнеп күзәттеләр.